Wananchi watakiwa kuzingatia taratibu za kupata Hati ya kusafiria Dodoma

By Halmashauri ya Jiji la Dodoma

Na. Coletha Charles, MNADANI

 

Wananchi wametakiwa kuzingatia taratibu na kuandaa nyaraka zinazohitajika wakati wa kuomba hati ya kusafiria nje ya nchi ili kurahisisha mchakato wa maombi na kuepuka usumbufu unaoweza kujitokeza.

 

Wito huo umetolewa na Afisa Uhamiaji, Constable Asia Mussa, wakati wa maadhimisho ya Siku ya Afya na Lishe ya Kijiji (SALiKi) na Samia Day 2026, yaliyofanyika katika Shule ya Msingi Jitegemee, Kata ya Mnanda, Jiji la Dodoma.

 

Alisema kuwa nyaraka zinazohitajika hutegemea shughuli za mwombaji na sababu za safari, akiwataka waombaji kuandaa vielelezo vinavyothibitisha utambulisho wao, shughuli wanazofanya na madhumuni ya safari.

 

“Ni muhimu mwombaji kuandaa nyaraka zinazohitajika kulingana na shughuli anazofanya na madhumuni ya safari yake ili kurahisisha mchakato wa maombi ya ‘passport’,” alisema Constable Mussa.

 

Alisema kuwa wafanyabiashara wanapaswa kuandaa fomu ya maombi ya hati ya kusafiria, kitambulisho cha taifa, barua ya utambulisho kutoka serikali ya mtaa na leseni ya biashara, kulingana na mahitaji ya maombi yao.

 

Aliongeza kuwa watu wanaokusudia kusafiri kwa ajili ya kumtembelea mtu wanapaswa kuandaa barua ya mwaliko kutoka kwa mwenyeji wao, barua ya utambulisho kutoka serikali ya mtaa na nyaraka nyingine zinazohitajika kuthibitisha madhumuni ya safari.

 

“Kwa upande wa wakulima na wafanyabiashara wadogo, taarifa za kifedha, ikiwamo taarifa ya akaunti ya benki, zinaweza kuhitajika kulingana na mazingira ya maombi na nyaraka zinazotakiwa kuthibitisha uwezo wa kifedha,” alisema Constable Mussa.

 

Nae mkazi wa Mtaa wa Mnadani, Gogo Mtemi alisema kuwa elimu hiyo ni muhimu katika kuwasaidia wananchi kufahamu taratibu za kuomba pasipoti na kuandaa nyaraka mapema.

 

“Elimu hii inatusaidia kuelewa umuhimu wa kuandaa nyaraka zinazohitajika kabla ya kuomba pasipoti, hivyo ni vyema kupata taarifa sahihi kutoka mamlaka husika ili kuepuka usumbufu,” alisema Mtemi.

 

Idara ya Uhamiaji imeendelea kuhimiza wananchi kupata taarifa sahihi kuhusu taratibu za maombi ya hati za kusafiria kupitia mamlaka husika, ili kuhakikisha wanakamilisha mahitaji yanayotakiwa kwa wakati na kuepuka ucheleweshaji unaoweza kuzuilika.

 

MWISHO

Comments

Post a Comment

Popular Posts

Hai DC yajifunza kuimarisha usafi na usimamizi wa taka Jiji la Dodoma

By Halmashauri ya Jiji la Dodoma
Image
Na. Mwandishi wetu, DODOMA   Viongozi na wataalamu wa Halmashauri ya Wilaya ya Hai mkoani Kilimanjaro wamejifunza mbinu za usafi wa mazingira na usimamizi wa taka katika Jiji la Dodoma kwa lengo la kuboresha usafi na kuimarisha utunzaji wa mazingira.   Ziara hiyo ilijumuisha kutembelea Dampo la Chidaya lililopo Jiji la Dodoma, ambako wajumbe walijifunza taratibu za upokeaji, utenganishaji, usafirishaji na uhifadhi wa taka.   Afisa Uendeshaji wa Dampo, Elias Banyikila alisema kuwa Dodoma huzalisha wastani wa tani 594 za taka kwa siku, huku tani 392 zikipokelewa d Dampo la Chidaya na tani 54 zikirejele­zwa.   Alisema kuwa dampo hilo lina ukubwa wa ekari 48, lakini takribani ekari 12 pekee ndizo zinazotumika, likiwa na miundombinu inayojumuisha uzio, ofisi, mizani, nyumba za walinzi na mitambo.   “Dampo hili linapokea taka za kawaida kutoka majumbani na masokoni, lakini taka hatarishi, ikiwemo za hospitalini, hushughulikiwa kwa utaratibu maalumu,”...
Read more

Kata ya Matumbulu wanufaika na Mil. 114.7 Maadhimisho ya Samia Day

By Halmashauri ya Jiji la Dodoma
Image
Na. Coletha Charles, MATUMBULU   Kata ya Matumbulu imepokea mikopo ya asilimia 10 yenye thamani ya shilingi milioni 114.785 kwa ajili ya wanawake, vijana na watu wenye ulemavu, ikiibua fursa za kujikwamua kiuchumi.   Akizungumza katika maadhimisho ya Samia Day, 2026 yaliyofanyika katika viwanja vya Shule ya Msingi Matumbulu, Mtaa wa Ukombozi, Afisa Maendeleo ya Jamii wa Kata hiyo, Merina Gombo alisema kuwa mikopo hiyo imewanufaisha wananchi na kuchangia maendeleo ya jamii.   Alisema kuwa walengwa wa mikopo hiyo ni wanawake, vijana na watu wenye ulemavu, ambao wamepata fursa ya kuendesha shughuli mbalimbali za kiuchumi na kujiongezea kipato.   “Wananchi na jamii ya Matumbulu wamenufaika sana na wamepata maendeleo kupitia mikopo hiyo. Hadi sasa, Kata ya Matumbulu imepokea shilingi milioni 114.785 kupitia mpango wa mikopo ya asilimia 10 kwa makundi maalum,” alisema Gombo.   Kwa upande wake, mkazi wa Mtaa wa Muungano, Kata ya Matumbulu, Suzana Albe...
Read more

Samia Day 2026 yaibua vipaji vya michezo Kata ya Matumbulu

By Halmashauri ya Jiji la Dodoma
Image
Na. Coletha Charles, MATUMBULU   Wananchi wa Mtaa wa Ukombozi Halmashauri ya Jiji la Dodoma, wameadhimisha Samia Day 2026 kwa kushiriki bonanza lililojumuisha michezo, burudani na shughuli za kijamii katika viwanja vya Shule ya Msingi Matumbulu.   Bonanza hilo lilihusisha michezo mbalimbali kama salakasi, soka, kuvuta kamba, kukimbiza kuku, bao, ngoma na kula, huku wananchi wakipata fursa ya kushiriki na kujumuika katika maadhimisho hayo.   Akizungumza katika bonanza hilo, Afisa Mtendaji wa Kata ya Matumbulu, Zuberi Mbawala alisema kuwa maandalizi hayo yalilenga kutoa nafasi kwa wananchi kushiriki katika shughuli za pamoja huku wakipata elimu kuhusu afya na lishe.   “Tumefanya michezo na shughuli mbalimbali za kijamii kwa lengo la kuwapa wananchi burudani, kuonesha vipaji na kuimarisha mshikamano. Lengo letu ni kuendelea kutoa hamasa, kuimarisha mshikamano na kuhakikisha jamii yetu inapata fursa ya kufurahia na kushiriki katika shughuli zenye manufaa,” ...
Read more