Jiji la Dodoma lavuna Tuzo Tano Nanenane, 2026

By Halmashauri ya Jiji la Dodoma

Na. Mwandishi wetu, DODOMA

 

Halmashauri ya Jiji la Dodoma imeibuka kidedea katika Maonesho ya Kilimo, Mifugo na Uvuvi ya Nanenane Kitaifa 2026 baada ya kutwaa tuzo tano, hatua inayoonesha mafanikio makubwa ya jiji hilo katika kuendeleza sekta za kilimo, mifugo na uvuvi.

 

Maonesho hayo yaliyofanyika katika Viwanja vya Dkt. John Samuel Malecela jijini Dodoma na kuhitimishwa Agosti 8, 2026 yaliwakutanisha washiriki mbalimbali kutoka maeneo tofauti ndani na nje ya nchi kwa ajili ya kuonesha ubunifu, teknolojia na fursa zilizopo katika sekta za uzalishaji.

 

Katika maonesho hayo, Halmashauri ya Jiji la Dodoma ilitwaa nafasi ya kwanza katika makundi ya Kilimo Ndani ya Uwanja, Mifugo Ndani ya Uwanja na Malisho Ndani ya Uwanja kwa upande wa Kanda ya Kati.

 

Aidha, jiji hilo lilipata nafasi ya pili katika kundi la Ufugaji Samaki katika Maonesho ya Ndani ya Uwanja Kanda ya Kati na kutunukiwa tuzo maalum (trophy) iliyotolewa na Rais wa Jamhuri ya Muungano wa Tanzania, Dkt. Samia Suluhu Hassan.

 

Mbali na ushindi huo, Halmashauri ya Jiji la Dodoma pia ilishika nafasi ya pili katika kundi la Jumla Mifugo Ndani ya Uwanja Kanda ya Kati, hivyo kukamilisha jumla ya tuzo tano zilizotolewa katika maonesho hayo ya kitaifa.

 

Mafanikio hayo yanaendelea kuthibitisha juhudi za Halmashauri ya Jiji la Dodoma katika kuimarisha uzalishaji wa kilimo, kuboresha ufugaji na kuhamasisha matumizi ya teknolojia bora kwa wakulima, wafugaji na wajasiriamali ili kuongeza tija na kuchangia ukuaji wa uchumi.

Comments

Post a Comment

Popular Posts

Jiji la Dodoma Biashara saa 24, usafi saa 24

By Halmashauri ya Jiji la Dodoma
Image
  Na. Mwandishi wetu, MSALATO   Wananchi wa Jiji la Dodoma wametakiwa kuendesha biashara saa 24 huku wakihakikisha usafi wa mazingira unafanyika muda wote, ili huduma ziendelee kupatikana bila kuathiri usafi wa maeneo yao.   Rai hiyo imetolewa wakati wa Uzinduzi wa Kampeni Endelevu ya Usafi wa Mazingira katika eneo la Mnada wa Msalato, jijini Dodoma, ambapo ilisisitizwa kuwa dhana ya “biashara saa 24” inapaswa kwenda sambamba na “usafi saa 24.”   Akizungumza wakati wa uzinduzi huo, Mkuu wa Wilaya ya Dodoma, Alhaj Jabir Shekimweri alisema kuwa maafisa afya pamoja na watendaji wa kata na mitaa watakuwa wakifanya ukaguzi wa mara kwa mara katika maeneo ya biashara ili kuhakikisha usafi unazingatiwa muda wote.   “Biashara masaa 24, lakini usafi masaa 24. Maafisa afya, watendaji wa kata na mitaa watakuwa wakipita kufanya ukaguzi, na atakayekaidi maelekezo ya usafi atatozwa faini ya shilingi 50,000 hadi shilingi 300,000,” alisema Alhaj Shekimweri. ...
Read more

Mvua za El Nino: DC Shekimweri awaasa wananchi wa Dodoma Kuchukua Tahadhari

By Halmashauri ya Jiji la Dodoma
Image
Na. Mwandishi wetu, NZUGUNI   Wananchi wanaoishi katika maeneo hatarishi wametakiwa kuchukua tahadhari mapema dhidi ya mvua za El Nino, ikiwemo kuepuka maeneo yanayoweza kukumbwa na mafuriko na kuhakikisha usalama wa familia zao.   Akizungumza wakati wa ziara ya ukaguzi wa bwawa la kuvunia maji ya mvua katika viwanja vya Dkt. John Malecela (Nanenane), Mkuu wa Wilaya ya Dodoma, Alhaj Jabir Shekimweri alisema kuwa wananchi wanaoishi katika maeneo hatarishi wanapaswa kuzingatia tahadhari zinazotolewa na mamlaka.   Alisema kuwa wananchi wanaoishi mabondeni, karibu na mito na maeneo yanayoweza kuathiriwa na mafuriko wanapaswa kuwa makini na kuchukua hatua mapema ili kuepusha madhara yanayoweza kusababishwa na mvua kubwa.   Aidha, aliwataka wananchi kuhakikisha mifereji na njia za maji hazizibwi kwa taka, akieleza kuwa hali hiyo inaweza kuzuia mtiririko wa maji na kuongeza uwezekano wa kutokea kwa mafuriko katika maeneo ya makazi.   Katika ziara hiyo, ...
Read more

Jukwaa la Uwezeshaji Wanawake Kiuchumi Wilaya ya Dodoma lapata viongozi wapya kwa miaka mitatu

By Halmashauri ya Jiji la Dodoma
Image
Na. Mwandishi wetu, VIWANDANI   Jukwaa la Uwezeshaji Wanawake Kiuchumi Wilaya ya Dodoma limepata uongozi mpya utakaohudumu kwa kipindi cha miaka mitatu baada ya uchaguzi uliofanyika kwa ushindani mkubwa.   Zoezi hilo limefanyika katika Viwanja vya Nyerere Square, Kata ya Viwandani, jijini Dodoma kwa lengo la kupata uongozi mpya wa ngazi ya wilaya kwa nafasi za mwenyekiti, makamu mwenyekiti, katibu, katibu msaidizi na wawakilishi.   Bhoke Manyori alichaguliwa kuwa Mwenyekiti baada ya kupata kura 54 dhidi ya Elizabeth Kasimila aliyepata kura 50 na kuchaguliwa kuwa Makamu Mwenyekiti.   Nafasi ya Katibu ilichukuliwa na Fatuma Saidi aliyepata kura 82, akifuatiwa na Janeth Bubegwa aliyepata kura 27, huku Joyce Masi akipata kura 13, ambapo Bubegwa akichaguliwa kuwa Katibu Msaidizi.   Katika nafasi ya uwakilishi, Ashura Nguya na Joyce Masi walipitishwa bila kupingwa na kuwa wawakilishi wa Jukwaa la Uwezeshaji Wanawake Kiuchumi Wilaya ya Dodoma. ...
Read more