Silage suluhisho la uhaba wa chakula cha mifugo Dodoma

By Halmashauri ya Jiji la Dodoma

Na. Mwandishi wetu, NZUGUNI

Wafugaji wa ng’ombe katika Halmashauri ya Jiji la Dodoma wamehimizwa kuanza kutengeneza na kuhifadhi chakula cha mifugo kilichochachushwa (Silage) ili kuhakikisha mifugo inapata lishe ya kutosha wakati wa kiangazi, kipindi ambacho maeneo mengi hukumbwa na upungufu mkubwa wa malisho kutokana na ukame.


Rai hiyo ilitolewa na Afisa Mifugo katika Halmashauri ya Jiji la Dodoma, Delila Mlamka wakati akiwaelezea wananchi waliotembelea banda la mifugo la halmashauri hiyo katika maonesho ya Nanenane yanayoendelea jijini hapa.

Alisema kuwa Silage ni chakula kinachotengenezwa kwa kuchanganya majani mabichi yaliyokatwakatwa, kiasi kidogo cha majani makavu, pumba na molases, kisha kuhifadhiwa kwenye mazingira yasiyoruhusu hewa ya oksijeni kuingia kwa siku 21 ili kichachuke vizuri na kuwa salama kwa matumizi ya mifugo.

Alisema kuwa chakula hicho  kinaweza kutengenezwa kwenye mashimo au mapipa na kuhifadhiwa katika mifuko midogo ya plastiki na mifuko maalumu ya kuhifadhia nafaka ‘kinga njaa’, ila tu hewa isiingie ndani ya kifungashio.

“Silage ni lishe bora na kinapendwa sana na ng’ombe wa maziwa kwa sababu kina mchanganyiko wa majani, pumba na molases unaosaidia kuongeza virutubisho muhimu kwa ukuaji wa mifugo na uzalishaji wa maziwa. Chakula hiki kinaweza kuhifadhiwa kwa zaidi ya miaka miwili bila kuharibika endapo kitaandaliwa na kuhifadhiwa kwa usahihi,” alisema Mlamka.

Kwa upande wake mfugaji wa ng’ombe kutoka Kata ya Nzuguni, Mussa Elisha alisema kuwa teknolojia ya silage itakuwa msaada mkubwa kwa wafugaji, hasa wakati wa kiangazi ambapo malisho hupungua kwa kiasi kikubwa.

“Hapo zamani tulipata wakati mgumu kulisha mifugo kipindi cha ukame, lakini sasa tukitengeneza silage mapema tunakuwa na uhakika wa chakula kwa muda mrefu. Hii itachangia mifugo yetu kubaki na afya nzuri na uzalishaji wa maziwa kuendelea hata wakati wa kiangazi,” alisema Elisha.

Kwa upande wake mdau wa mifugo katika Halmashauri ya Jiji la Dodoma, Elineema Kikumbi alisema kuwa utunzaji wa malisho kupitia teknolojia ya silage ni hatua muhimu ya kuongeza tija katika sekta ya mifugo na kukabiliana na athari za mabadiliko ya tabianchi.

“Dodoma ni moja ya maeneo yanayokumbwa na ukame mara kwa mara. Wafugaji wanapaswa kutumia kipindi cha mvua kuandaa akiba ya chakula cha mifugo. Silage ni suluhisho la kudumu ambalo litasaidia kupunguza vifo vya mifugo, kuongeza uzalishaji na kuinua kipato cha wafugaji,” alisema Kikumbi.

Wataalamu wa mifugo wanaendelea kuhimiza wafugaji kuwekeza katika utengenezaji wa silage ili kuwa na akiba ya malisho mwaka mzima, hatua itakayosaidia kuongeza uzalishaji wa maziwa na nyama pamoja na kuimarisha ustahimilivu wa sekta ya mifugo dhidi ya ukame.

Comments

Post a Comment

Popular Posts

Mvua za El Nino: DC Shekimweri awaasa wananchi wa Dodoma Kuchukua Tahadhari

By Halmashauri ya Jiji la Dodoma
Image
Na. Mwandishi wetu, NZUGUNI   Wananchi wanaoishi katika maeneo hatarishi wametakiwa kuchukua tahadhari mapema dhidi ya mvua za El Nino, ikiwemo kuepuka maeneo yanayoweza kukumbwa na mafuriko na kuhakikisha usalama wa familia zao.   Akizungumza wakati wa ziara ya ukaguzi wa bwawa la kuvunia maji ya mvua katika viwanja vya Dkt. John Malecela (Nanenane), Mkuu wa Wilaya ya Dodoma, Alhaj Jabir Shekimweri alisema kuwa wananchi wanaoishi katika maeneo hatarishi wanapaswa kuzingatia tahadhari zinazotolewa na mamlaka.   Alisema kuwa wananchi wanaoishi mabondeni, karibu na mito na maeneo yanayoweza kuathiriwa na mafuriko wanapaswa kuwa makini na kuchukua hatua mapema ili kuepusha madhara yanayoweza kusababishwa na mvua kubwa.   Aidha, aliwataka wananchi kuhakikisha mifereji na njia za maji hazizibwi kwa taka, akieleza kuwa hali hiyo inaweza kuzuia mtiririko wa maji na kuongeza uwezekano wa kutokea kwa mafuriko katika maeneo ya makazi.   Katika ziara hiyo, ...
Read more

Jiji la Dodoma Biashara saa 24, usafi saa 24

By Halmashauri ya Jiji la Dodoma
Image
  Na. Mwandishi wetu, MSALATO   Wananchi wa Jiji la Dodoma wametakiwa kuendesha biashara saa 24 huku wakihakikisha usafi wa mazingira unafanyika muda wote, ili huduma ziendelee kupatikana bila kuathiri usafi wa maeneo yao.   Rai hiyo imetolewa wakati wa Uzinduzi wa Kampeni Endelevu ya Usafi wa Mazingira katika eneo la Mnada wa Msalato, jijini Dodoma, ambapo ilisisitizwa kuwa dhana ya “biashara saa 24” inapaswa kwenda sambamba na “usafi saa 24.”   Akizungumza wakati wa uzinduzi huo, Mkuu wa Wilaya ya Dodoma, Alhaj Jabir Shekimweri alisema kuwa maafisa afya pamoja na watendaji wa kata na mitaa watakuwa wakifanya ukaguzi wa mara kwa mara katika maeneo ya biashara ili kuhakikisha usafi unazingatiwa muda wote.   “Biashara masaa 24, lakini usafi masaa 24. Maafisa afya, watendaji wa kata na mitaa watakuwa wakipita kufanya ukaguzi, na atakayekaidi maelekezo ya usafi atatozwa faini ya shilingi 50,000 hadi shilingi 300,000,” alisema Alhaj Shekimweri. ...
Read more

Wananchi Dodoma wahimizwa kufanya usafi wa Mazingira kila siku

By Halmashauri ya Jiji la Dodoma
Image
Na. Amoni Sambulila, MSALATO Wananchi mkoani Dodoma wamehimizwa kufanya usafi   wa mazingira kila siku na kuhakikisha mazingira yanayowazunguka yanakuwa safi na salama kwa afya na ustawi wa jamii. Akizungumza wakati wa uzinduzi wa Kampeni ya Usafi wa Mazingira mkoani Dodoma, uliofanyika katika eneo la Mnada wa Msalato, Mkuu wa Mkoa wa Dodoma, Rosemary Senyemule alisema kuwa kufanya usafi ni wajibu wa kila mwananchi na si jukumu la taasisi au mamlaka pekee. Aliongeza Kwa kuwataka wananchi kushiriki kikamilifu katika shughuli za usafi, kutunza maeneo yao na kuendelea kuzingatia usafi wa mazingira katika maisha yao ya kila siku. Kwa upande wake, mwananchi wa Msalato, Juma Ally alisema kuwa ushiriki wa jamii ni muhimu katika kuhakikisha kampeni hiyo inakuwa na matokeo chanya na kuleta mabadiliko katika maeneo mbalimbali. Nae, mwananchi wa Msalato, Neema Ramadhani aliwahimiza wananchi kufanya usafi kuwa sehemu ya maisha yao ya kila siku, ikiwemo kutunza maeneo ya makazi na maene...
Read more