Jiji la Dodoma laweka mkakati wa kudhibiti msongamano wa Bajaj na Daladala Stendi ya Mnada mpya

By Halmashauri ya Jiji la Dodoma

Na. Mwandishi wetu, KIZOTA

 

Halmashauri ya Jiji la Dodoma imeanza kuchukua hatua za kuboresha matumizi ya Kituo cha Mabasi Mnada Mpya kilichopo Kata ya Kizota kwa kuhakikisha daladala na bajaji zinaingia ndani ya kituo hicho wakati wa kupakia na kushusha abiria, badala ya kusimama nje ya kituo.

 


Hatua hiyo inalenga kuweka utaratibu katika eneo hilo, kupunguza msongamano wa vyombo vya usafiri pamoja na kuimarisha usalama na urahisi wa huduma kwa wananchi wanaotumia kituo hicho.

 

Akizungumza wakati wa ziara ya kukagua maendeleo ya mradi wa ujenzi wa Stendi ya Mnada Mpya iliyopo Kata ya Kizota, Mkuu wa Mkoa wa Dodoma, Rosemary Senyamule, alisisitiza umuhimu wa halmashauri kuhakikisha kituo hicho kinatumika kwa kuzingatia utaratibu uliowekwa.

 

Senyamule alielekeza daladala na bajaji kuingia ndani ya kituo wakati wa kupakia na kushusha abiria, akieleza kuwa hatua hiyo itasaidia kuboresha mtiririko wa usafiri na kuhakikisha mazingira ya kituo yanakuwa salama na yenye utaratibu.

 


Aidha, mkuu huyo wa mkoa aliitaka Halmashauri ya Jiji la Dodoma kuendelea kusimamia kwa karibu changamoto za miundombinu zinazoweza kuathiri matumizi ya kituo hicho, ikiwemo hali ya barabara zinazoingia katika kituo hicho, pamoja na kuzingatia maandalizi ya kukabiliana na mvua zinazotarajiwa.

 

Kwa upande wake, Mkurugenzi wa Jiji la Dodoma, Dkt. Frederick Sagamiko, alisema kuwa halmashauri imepokea maelekezo hayo na imeanza kuchukua hatua kuhakikisha shughuli za usafiri katika Kituo cha Mnada Mpya zinafanyika kwa utaratibu na wananchi wanapata huduma bora.

 

Aliongeza kuwa halmashauri itaendelea kushirikiana na wadau wa usafiri pamoja na wananchi katika kuboresha matumizi ya kituo hicho na kushughulikia changamoto zinazojitokeza, ikiwa ni sehemu ya juhudi za kuimarisha huduma za usafiri ndani ya Jiji la Dodoma.

Comments

Post a Comment

Popular Posts

Kata za Nkuhungu na Kizota zajiandaa kukabiliana na mvua za El Nino

By Halmashauri ya Jiji la Dodoma
Image
Na. Mwandishi wetu, DODOMA   Kanda Namba Tatu ya utoaji huduma katika Halmashauri ya Jiji la Dodoma imefanya zoezi la usafi wa maeneo ya Kizota Relini na Mkonongo, Kata ya Nkuhungu, ikiwa ni sehemu ya maandalizi ya kukabiliana na athari zinazoweza kusababishwa na mvua kubwa za El Niño.   Zoezi hilo lilihusisha ufunguaji na usafishaji wa mitaro, uondoaji wa taka pamoja na ukaguzi wa miundombinu ya kupitisha maji, hatua zinazolenga kupunguza hatari ya maji kujaa katika maeneo ya makazi na biashara.   Kaimu Meneja wa Kanda Namba Tatu, Vestina Manota aliwashukuru watumishi na wananchi kwa kushiriki katika zoezi hilo, akisema usafi wa mazingira ni muhimu katika maandalizi ya kukabiliana na athari za mvua za El Niño.   “Tunawahimiza wananchi kuendelea kufanya usafi kila siku na kuondoa taka kwenye mitaro ili kuhakikisha maji yanapata njia ya kupita kwa urahisi,” alisema Manota.   Diwani wa Kata ya Nkuhungu, Julius Ezekiel aliwataka wananchi kuchukua ta...
Read more

Zoezi la Kuua Mbwa Wanao Zurura Lafanyika Kata ya Msalato

By Halmashauri ya Jiji la Dodoma
Image
Na. Manase Malima, MSALATO   Zoezi la kuua mbwa wanao zurura limefanyika katika Kata ya Msalato, Halmashauri ya Jiji la Dodoma, likihusisha maeneo ya Machinjioni, Magereza na Mnadani, kutokana na kero na hatari zinazowakabili wananchi ambapo mbwa zaidi ya 20 waliuliwa. Akizungumza wakati wa zoezi hilo, Afisa Mifugo wa Kanda Namba Sita ya utoaji huduma Halmashauri ya Jiji la Dodoma, Prisca Mottee alisema kuwa mbwa hao wamekuwa wakisababisha usumbufu kwa wananchi, wakiwemo watoto na wanafunzi wanaokwenda na kurudi shuleni, Afisa Mifugo kanda Namba Sita aliongeza kuwa zoezi hilo ni endelevu na litafanyika katika maeneo mengine yenye changamoto hiyo, huku akiwataka wafugaji kuwafungia mbwa wao na kuzingatia kuwapatia chanjo. Kwa upande wake Afisa Mifugo Kata ya Msalato, Maisha Jiwa alisema kuwa hatua hiyo imechukuliwa kufuatia malalamiko ya wananchi kuhusu mbwa wanao zurura katika maeneo mbalimbali ya kata hiyo. “Kumekuwa na adha kubwa ya mbwa wanaozurura katika maeneo ya Machi...
Read more

Kata ya Miyuji Yaongeza Kasi ya Usimamizi Wa Usafi wa Mazingira

By Halmashauri ya Jiji la Dodoma
Image
Na. Manase Malima, MIYUJI   Kata ya Miyuji katika Halmashauri ya Jiji la Dodoma imechukua hatua za kuimarisha usafi wa mazingira kwa kufanya ukaguzi wa vikundi vinavyohusika na ukusanyaji na uondoshaji wa taka, ikiwa ni sehemu ya utekelezaji wa wito wa Rais wa Jamhuri ya Muungano wa Tanzania, Dkt. Samia Suluhu Hassan wa kuhakikisha miji na majiji yanakuwa safi. Katika kutekeleza wito huo, wa Rais wa Jamhuri ya Muungano wa Tanzania, Dkt. Samia Suluhu Hassan wa kuhakikisha miji na majiji yanakuwa safi, Kata ya Miyuji katika Halmashauri ya Jiji la Dodoma   imeelekeza nguvu katika kuboresha mfumo wa ukusanyaji na uondoshaji wa taka kupitia vikundi vinavyofanya shughuli hiyo katika mitaa ya kata. Leo tarehe 11 Septemba, 2026 Kamati ya Maendeleo ya Kata ya Miyuji, ikiongozwa na Diwani wa Kata hiyo, Ringo Iringo, imefanya ukaguzi wa vifaa vinavyotumika katika shughuli za usafi, ikiwemo magari, na vifaa kinga kwa watendaji. Ukaguzi huo umehusisha kuangalia hali ya vifaa, mahitaj...
Read more