City Boys na Royal Village Hotel waunga mkono Timu ya Dodoma Jiji kuelekea SHIMISEMITA

By Halmashauri ya Jiji la Dodoma

 Na. Mwandishi wetu, DODOMA

KAMPUNI ya uuzaji wa vifaa mbalimbali vya nyumbani na vyombo vya moto City Boys, kwa kushirikiana na Royal Village Hotel, imeendelea kuonesha mshikamano katika kuendeleza michezo kwa kuunga mkono Timu ya Watumishi wa Halmashauri ya Jiji la Dodoma kwa kuwakabidhi jezi mbalimbali za michezo kuelekea mashindano ya Shirikisho la Michezo ya Serikali za Mitaa Tanzania (SHIMISEMITA).



Timu hiyo inayojipanga kushiriki mashindano hayo yanayotarajiwa kufanyika mwezi Agosti mwaka huu jijini Mbeya, imekabidhiwa bibsi, jezi za mpira wa kikapu pamoja na jezi za mpira wa miguu, hatua inayolenga kuongeza hamasa, morali na ari kwa watumishi wanaoiwakilisha Halmashauri ya Jiji la Dodoma katika mashindano hayo.

Akizungumza wakati wa makabidhiano hayo yaliyofayika ofisini kwake Kaimu Mkurugenzi wa Kampuni ya City Boys, Patricia Olomi alisema kuwa wameamua kuunga mkono timu hiyo kwa kutambua nafasi ya michezo katika kujenga afya, mshikamano na kuongeza ufanisi wa watumishi. “Tumeona ni muhimu kuwa sehemu ya maandalizi ya timu yetu kuelekea SHIMISEMITA. Mchango huu ni ishara ya ushirikiano na dhamira yetu ya kuendelea kuunga mkono michezo pamoja na kuwahamasisha watumishi kufanya vizuri ndani na nje ya maeneo yao ya kazi” alisema Olomi.

Kwa upande wake, Meneja wa Royal Village Hotel, Frank Lyimo alisema kuwa michezo ni nyenzo muhimu ya kujenga mahusiano, afya na mshikamano miongoni mwa watumishi, hivyo taasisi binafsi zina wajibu wa kushirikiana na Serikali katika kuendeleza sekta hiyo. “Tunaamini jezi hizi si mavazi pekee, bali ni sehemu ya kuwapa nguvu na hamasa wachezaji wanapokwenda kuiwakilisha Dodoma. Tunawatakia kila la heri na tunaamini watafanya vizuri huko Mbeya” alisema Lyimo.



Kwa upande wake Afisa Michezo wa Jiji la Dodoma, Neema Kilongola aliwashukuru City Boys na Royal Village Hotel kwa msaada huo, akisema umeongeza morali na kuleta nguvu mpya katika maandalizi ya timu kuelekea mashindano hayo. “Tunawashukuru sana City Boys na Royal Village Hotel kwa kutambua juhudi zetu na kuamua kuwa sehemu ya safari yetu kuelekea SHIMISEMITA. Msaada huu umetupa hamasa kubwa na tunawaahidi kuwa tutapambana kwa nguvu zetu zote na kupata matokeo mazuri” alisema Kilongola.

Kwa sasa, Timu ya Watumishi wa Halmashauri ya Jiji la Dodoma inaendelea na maandalizi yake kwa kufanya mazoezi na michezo ya kirafiki, ikiwa na lengo la kuhakikisha inafika jijini Mbeya ikiwa na utimamu kimwili, kiakili na kimchezo kupambana kwa ajili ya heshima ya Jiji la Dodoma.

Comments

Post a Comment

Popular Posts

Barabara za Mtaa wa Mbwanga yafunguliwa, Diwani Kerenge aitaja kuwa chachu ya maendeleo

By Halmashauri ya Jiji la Dodoma
Image
Na. Mwandishi wetu, Dodoma Wakazi wa Mtaa wa Mbwanga katika Kata ya Mnadani wanatarajia kunufaika na usafiri rahisi, kuimarika kwa shughuli za biashara na kuongezeka kwa fursa za maendeleo kufuatia ufunguzi wa barabara za mtaa katika uboreshaji wa miundombinu kwa ajili ya maisha bora ya wananchi. Akizungumza wakati wa hafla ya ufunguzi wa barabara hiyo, iliyofanyika katika moja ya barabara hizo, Diwani wa Kata ya Mnadani, Mugendi Kerenge alisema kuwa uboreshaji wa miundombinu ya barabara ni nguzo muhimu ya maendeleo kwa kuwa unarahisisha usafirishaji wa watu na bidhaa, kuchochea biashara na kuongeza upatikanaji wa huduma za kijamii. “Kukamilika kwa barabara zaidi ya kilomita 14 zimefunguliwa   hii ni hatua muhimu katika safari ya maendeleo ya Kata ya Manadani. Itaondoa changamoto zilizokuwa zikiwakabili wananchi, hasa wakati wa mvua, na kufungua fursa zaidi za kiuchumi kwa wakazi wa Mbwanga na maeneo jirani. Natoa shukrani kwa Mkurugenzi wa Jiji la Dodoma kwa kutuwezesha kufani...
Read more

Kanda Namba Tatu yaimarisha ushirikiano na wamiliki wa vituo vya malezi ya watoto Dodoma

By Halmashauri ya Jiji la Dodoma
Image
Na. Mwandishi wetu, DODOMA Uongozi wa Kanda Namba Tatu umefanya kikao na wamiliki wa vituo vya malezi ya watoto (Daycare) vinavyopatikana ndani ya kanda hiyo kwa lengo la kuimarisha utoaji wa huduma za malezi na maendeleo ya watoto. Akizungumza katika kikao hicho kilihofanyika katika Ofisi ua Kanda, Meneja wa Kanda Namba Tatu, CPA. Christina Changwala aliwataka wamiliki wa vituo hivyo kuhakikisha wanatoa malezi yanayozingatia maadili, mila na tamaduni za kitanzania ili kujenga kizazi chenye maadili mema na chenye mchango chanya katika maendeleo ya taifa.   Aidha, aliwahimiza wamiliki wa vituo hivyo kuhakikisha wanakamilisha usajili wa vituo vyao ili vitambulike rasmi na viweze kuingizwa katika mifumo ya serikali ili kurahisisha usimamizi na utoaji wa huduma kwa mujibu wa sheria na taratibu. Wamiliki hao pia walikumbushwa umuhimu wa kutimiza wajibu wa kulipa kodi na tozo mbalimbali zinazotozwa na Halmashauri ya Jiji la Dodoma pamoja na mamlaka nyingine husika, kwa wakati kwa k...
Read more