Wanafunzi Kizota S/M wapatiwa chanjo dhidi ya Polio

By Halmashauri ya Jiji la Dodoma

Na. Jesca Kipingu, KIZOTA

 

Wataalamu wa afya kutoka Kituo cha Afya Kizota wamefika katika Shule ya Msingi Kizota, Kata ya Kizota, Halmashauri ya Jiji la Dodoma, kwa ajili ya kutoa chanjo ya Polio kwa watoto wenye umri wa kuanzia miezi 0 hadi miaka 10, ikiwa ni sehemu ya kampeni inayoendelea ya kuwakinga watoto dhidi ya ugonjwa huo na madhara yake, ikiwemo ulemavu wa kudumu.


 

Akizungumza wakati wa zoezi hilo, Katibu wa Afya katika Halmashauri ya Jiji la Dodoma ambaye pia ni Msimamizi wa Kampeni ya Chanjo ya Polio, Hapiness Kaungya, aliwashukuru wazazi kwa mwitikio mkubwa walioonesha katika kuhakikisha watoto wao wanapatiwa chanjo. Alisisitiza kuwa ushiriki wa wazazi na walezi ni muhimu katika kuhakikisha watoto wanapata kinga dhidi ya ugonjwa wa Polio.

 

Aidha, Kaungya aliitaka jamii kuendelea kupata na kuzingatia taarifa sahihi zinazotolewa na wataalamu wa afya ili kuondokana na dhana potofu kuhusu chanjo. Alisema kuwa ushirikiano wa wazazi, walezi na jamii kwa ujumla una mchango mkubwa katika kufanikisha kampeni hiyo na kulinda afya na ustawi wa watoto.

 

Kwa upande wake, Afisa Muuguzi Msaidizi II, Naomi Simon alisema kuwa zoezi la utoaji wa chanjo katika Shule ya Msingi Kizota limekuwa na mwitikio mzuri, jambo linaloonesha utayari wa wazazi na walezi kushirikiana na wataalamu wa afya. Aliwaomba wazazi kuendelea kutoa ushirikiano pale wataalamu wa afya watakapofika katika maeneo ya makazi yao kuwapatia watoto chanjo.

 

Nae Kiongozi wa Wahudumu wa Afya Ngazi ya Jamii (CHW) wa Kata ya Kizota, Kabla Pima aliwapongeza wazazi wa kata hiyo kwa mwitikio chanya walioonesha, akieleza kuwa ushirikiano wao umechangia kurahisisha utekelezaji wa kampeni ya chanjo. Aliwasihi wazazi ambao watoto wao bado hawajapatiwa chanjo kuhakikisha wanawapeleka kupata huduma hiyo kwa manufaa ya afya na ustawi wao.

 

Kwa upande wake Mwalimu wa Afya wa Shule ya Msingi Kizota, Mwl. Adelmas Mmbando alisema kuwa amefurahi kushiriki katika zoezi hilo na kuwahimiza wazazi kuondokana na dhana potofu kuhusu chanjo.

 

Nae mwanafunzi wa Darasa la Nne, Martha Musa, alisema kuwa wazazi wana nafasi kubwa katika kuhakikisha watoto wanakuwa na afya njema na kufikia ndoto zao kwa kuwapatia kinga dhidi ya magonjwa yanayoweza kuathiri maisha yao.

 

Kwa ujumla, zoezi hilo linaendelea kuonesha umuhimu na ushirikiano kati ya wataalamu wa afya, shule, wazazi na jamii katika kuhakikisha kila mtoto mwenye umri kuanzia mwezi 0-miaka 10 anapatiwa chanjo.

 

Comments

Post a Comment

Popular Posts

Vijana watakiwa kujiendeleza nje ya mfumo rasmi

By Halmashauri ya Jiji la Dodoma
Image
Na. Lulu Luvanda, DODOMA Jamii imetakuwa kuwahamasisha vijana waliokosa elimu katika mfumo rasmi kujiunga na Mpango wa Elimu Changamani kwa Vijana walio nje ya shule nchini Tanzania (IPOSA) ili kupata fursa ya kujiendeleza kielimu nje ya mfumo rasmi. Akizungumza katika maadhimisho ya Juma la Elimu ya Watu wazima na nje ya mfumo rasmi yanayofanyika katika viwanja vya Nyerere square, Afisa Elimu ya Watu Wazima na Elimu Nje ya Mfumo Rasmi wa Elimu kutoka Halmashauri ya Wilaya ya Chamwino, Annamaria Kidunda, alisema kuwa IPOSA inalenga kuwapa fursa vijana na wanafunzi ambao walishindwa kuendelea na mfumo rasmi wa elimu kupata nafasi nyingine ya kupata elimu nje ya mfumo rasmi. Kwa mujibu wa Kidunda, IPOSA ni darasa linalowahusisha wanafunzi waliokatisha masomo au kushindwa kuendelea na mfumo rasmi wa elimu, kwa kuwawezesha kupata elimu na mafunzo yatakayowasaidia kukabiliana na mahitaji ya maisha ya sasa. Alisema kuwa programu hiyo inalenga kuondoa pengo katika elimu kwa kuwapatia wa...
Read more

NGOs zatakiwa kuzingatia uwazi na uwajibikaji Dodoma

By Halmashauri ya Jiji la Dodoma
Image
Na. Manase Malima, DODOMA Mashirika yasiyo ya kiserikali wilayani Dodoma yamehimizwa kuzingatia uwazi na uwajibikaji katika utekelezaji wa shughuli na miradi yao ili kuongeza uaminifu na kuhakikisha rasilimali zinatumika kwa manufaa ya jamii. Akizungumza katika mkutano wa Jukwaa la Mashirika Yasiyo ya Kiserikali uliofanyika katika ukumbi wa Halmashauri ya Jiji la Dodoma, Mratibu na Msajili Msaidizi wa Mashirika yasiyo ya kiserikali wa Halmashauri ya Jiji la Dodoma, Peter Mallya alisema kuwa, mashirika yanapaswa kuwa wazi katika utekelezaji wa shughuli zao na kuwajibika kwa wadau pamoja na jamii wanazozihudumia. Aliongeza kuwa uwazi katika utoaji wa taarifa, utekelezaji wa miradi na matumizi ya rasilimali ni muhimu katika kuimarisha uaminifu na ufanisi wa mashirika hayo. Kwa upande wake, Mtendaji Mkuu wa Shirika la SAIKO SENTA (Psychology Sensitization Networking of Tanzania), Sylvia Siriwa alisema kuwa uwazi na uwajibikaji vinasaidia kujenga imani kati ya mashirika, wadau na jamii,...
Read more