DC Shekimweri aagiza utambuzi wa kaya maeneo hatarishi

By Halmashauri ya Jiji la Dodoma

Na. Coletha Charles, NZUGUNI

Idara ya Ustawi wa Jamii, Maendeleo ya Jamii, Madiwani, Watendaji wa Kata na Polisi Kata, wameagizwa kushirikiana na mamlaka nyingine kubaini kaya zinazoishi katika maeneo hatarishi, ikiwemo njia za asili za maji, yanayoweza kuhatarisha usalama wa maisha na mali za wananchi na kuzihamasisha kuhamia katika maeneo salama.



Agizo hilo limetolewa na Mkuu wa Wilaya ya Dodoma, Alhaj Jabir Shekimweri katika Jengo la Utawala la Viwanja vya maonesho ya Nanenane vya Dkt. John Malecela Kata ya Nzuguni, wakati wa utekelezaji wa maelekezo ya Rais, Dkt. Samia Suluhu Hassan kuhusu kuchukua hatua za kuzuia na kupunguza athari za mvua za El Nino pamoja na mvua zitakazokuwa juu ya wastani.

 

Alisema kuwa baadhi ya wananchi wamekuwa wakijenga katika njia za asili za maji, hususan wakati wa kiangazi, jambo ambalo linaweza kuhatarisha maisha na mali wakati wa mvua, ambapo maji hurejea katika mikondo yake ya kawaida.

 

“Ujenzi katika maeneo hatarishi hauathiri usalama wa mtu anayejenga pekee, bali pia huweka familia yake, hususan watoto, katika mazingira ya hatari. Suala hili linapaswa kuangaliwa kwa kuzingatia haki na usalama wa watoto kwa mujibu wa Sheria ya Mtoto Na. 21 ya Mwaka 2009,” alisema Alhaj Shekimweri.

 


Aidha, alisisitiza umuhimu wa wananchi kuzingatia taratibu za ujenzi mijini, ikiwemo mipango ya matumizi ya ardhi na kupata vibali vya ujenzi kabla ya kuanza ujenzi. “Hatupaswi kusubiri madhara yatokee ndipo tuchukue hatua. Tunapaswa kuwaelimisha wananchi na kuhakikisha wanatoka katika maeneo hatarishi na kwenda kuishi katika maeneo salama,” alisema Alhaj Shekimweri.

 

Kwa upande wake, Diwani wa Kata ya Nzuguni, Leonard Ndama, alisema kuwa mikakati iliyowekwa na serikali inaweza kusaidia kupunguza athari za mvua hizo, licha ya kutokuwepo kwa uhakika kuhusu kiwango cha mvua kitakachonyesha.

 

“Kwa namna ambavyo mikakati hii imewekwa, nina imani tunaweza kupunguza kwa kiasi fulani madhara, kwa kuwa hatuwezi kujua kiwango cha mvua kitakachonyesha wala ukubwa wa madhara yanayoweza kujitokeza,” alisema Ndama.

 



Nae, Mkuu wa Jeshi la Zimamoto na Uokoaji Wilaya ya Dodoma, Insp. Deogratus Peter, alisema kuwa wananchi wanapaswa kutoa taarifa mapema pindi wanapokumbana na changamoto zinazohusiana na maji ili timu za uokoaji ziweze kufika kwa wakati.

 

“Ningewaomba watendaji wa mtaa wowote, patakapotokea changamoto, sio tu Kata ya Nzuguni, wasisite kutuambia kwa kutupigia namba zetu za dharura. Kuna maji yamezingira au labda kuna bwawa watoto wana shida, basi sisi tuweze kufika kwa wakati na kutoa msaada huo,” alisema Insp. Peter.

 

Hatua za mapema za kubaini kaya zinazoishi katika maeneo hatarishi na kuzielekeza kwenye maeneo salama ni muhimu katika kulinda maisha na mali.

MWISHO

Comments

Post a Comment

Popular Posts

Vijana watakiwa kujiendeleza nje ya mfumo rasmi

By Halmashauri ya Jiji la Dodoma
Image
Na. Lulu Luvanda, DODOMA Jamii imetakuwa kuwahamasisha vijana waliokosa elimu katika mfumo rasmi kujiunga na Mpango wa Elimu Changamani kwa Vijana walio nje ya shule nchini Tanzania (IPOSA) ili kupata fursa ya kujiendeleza kielimu nje ya mfumo rasmi. Akizungumza katika maadhimisho ya Juma la Elimu ya Watu wazima na nje ya mfumo rasmi yanayofanyika katika viwanja vya Nyerere square, Afisa Elimu ya Watu Wazima na Elimu Nje ya Mfumo Rasmi wa Elimu kutoka Halmashauri ya Wilaya ya Chamwino, Annamaria Kidunda, alisema kuwa IPOSA inalenga kuwapa fursa vijana na wanafunzi ambao walishindwa kuendelea na mfumo rasmi wa elimu kupata nafasi nyingine ya kupata elimu nje ya mfumo rasmi. Kwa mujibu wa Kidunda, IPOSA ni darasa linalowahusisha wanafunzi waliokatisha masomo au kushindwa kuendelea na mfumo rasmi wa elimu, kwa kuwawezesha kupata elimu na mafunzo yatakayowasaidia kukabiliana na mahitaji ya maisha ya sasa. Alisema kuwa programu hiyo inalenga kuondoa pengo katika elimu kwa kuwapatia wa...
Read more

NGOs zatakiwa kuzingatia uwazi na uwajibikaji Dodoma

By Halmashauri ya Jiji la Dodoma
Image
Na. Manase Malima, DODOMA Mashirika yasiyo ya kiserikali wilayani Dodoma yamehimizwa kuzingatia uwazi na uwajibikaji katika utekelezaji wa shughuli na miradi yao ili kuongeza uaminifu na kuhakikisha rasilimali zinatumika kwa manufaa ya jamii. Akizungumza katika mkutano wa Jukwaa la Mashirika Yasiyo ya Kiserikali uliofanyika katika ukumbi wa Halmashauri ya Jiji la Dodoma, Mratibu na Msajili Msaidizi wa Mashirika yasiyo ya kiserikali wa Halmashauri ya Jiji la Dodoma, Peter Mallya alisema kuwa, mashirika yanapaswa kuwa wazi katika utekelezaji wa shughuli zao na kuwajibika kwa wadau pamoja na jamii wanazozihudumia. Aliongeza kuwa uwazi katika utoaji wa taarifa, utekelezaji wa miradi na matumizi ya rasilimali ni muhimu katika kuimarisha uaminifu na ufanisi wa mashirika hayo. Kwa upande wake, Mtendaji Mkuu wa Shirika la SAIKO SENTA (Psychology Sensitization Networking of Tanzania), Sylvia Siriwa alisema kuwa uwazi na uwajibikaji vinasaidia kujenga imani kati ya mashirika, wadau na jamii,...
Read more

Ziara ya DC kukagua ujenzi wa Barabara Dodoma

By Halmashauri ya Jiji la Dodoma
Image
  Mkuu wa Wilaya ya Dodoma, Mhe. Alhaj Jabir Shekimweri, ametembelea na kukagua maendeleo ya ujenzi wa barabara tatu zinazotekelezwa na Wakala wa Barabara za Vijijini na Mijini (TARURA) katika Halmashauri ya Jiji la Dodoma. •      Barabara Nzuguni – kwa Masista (KM 0.5) kwa kiwango cha lami, pamoja na Barabara ya Nzuguni – Makaburini (KM1.5) kwa kiwango cha changarawe, ikiwa na gharama ya shilingi milioni 694.1 fedha kutoka Road Fund Development. •      Mradi wa uboreshaji wa Barabara ya Mwangaza (KM1.1) kwa kiwango cha lami, kwa gharama ya shilingi Bilioni 1.6. •      Mradi wa uboreshaji wa Barabara ya Mwangaza – Mwambosa (KM 0.7) kwa kiwango cha lami, gharama ya mradi ni shilingi milioni 880.1.
Read more