Uendelevu wa NGOs wapatiwa msukumo wilayani Dodoma

By Halmashauri ya Jiji la Dodoma

Na. Amoni Sambulila, DODOMA

 

Halmashauri ya Jiji la Dodoma kupitia Jukwaa la Mashirika Yasiyo ya Kiserikali imeendelea kutoa msukumo kwa mashirika hayo kuimarisha uendelevu wa shughuli na miradi wanayoitekeleza, ili kuhakikisha huduma zinazotolewa zinaendelea kuwa na manufaa kwa jamii kwa muda mrefu.

 


Akizungumza katika mkutano wa Jukwaa la Mashirika Yasiyo ya Kiserikali uliofanyika katika ukumbi wa Halmashauri ya Jiji la Dodoma, Afisa Maendeleo ya Jamii katika Halmashauri ya Jiji la Dodoma, Ester Erick alisema kuwa uendelevu wa mashirika hayo ni muhimu katika kuhakikisha miradi na huduma zinazotekelezwa kwa ajili ya wananchi zinaendelea kutoa matokeo chanya.

 

Alisema kuwa katika kipindi cha utekelezaji, jumla ya miradi 30 ilitekelezwa katika maeneo mbalimbali, ikiwemo afya, elimu, utunzaji wa mazingira, msaada wa kisheria pamoja na shughuli zinazohusisha Dawati la Jinsia.

 

“Jumla ya miradi 30 imetekelezwa katika maeneo ya afya, elimu, utunzaji wa mazingira, msaada wa sheria na Dawati la Jinsia, kwa gharama ya shilingi milioni 180.87 na kuwafikia wanufaika 23,632, kati yao wanaume ni 6,001, wanawake ni 7,419 na watoto 10,212” alisema Erick.

 

Kwa upande wake, Mkurugenzi Mkuu wa Rise up Integrity for Human Support (RIHS), John Malale alisema kuwa ushirikiano kati ya serikali, mashirika yasiyo ya kiserikali na wadau wengine ni muhimu katika kuhakikisha miradi inayotekelezwa inaleta matokeo yenye tija na endelevu kwa jamii.

 


Nae Mkurugenzi Mkuu wa God Bless Network Foundation, Julius Kilabuka alisema kuwa mashirika yasiyo ya kiserikali yanapaswa kuendelea kuimarisha uwezo wao wa kiutendaji pamoja na kujenga ushirikiano madhubuti na wadau mbalimbali ili kuhakikisha huduma zinazotolewa kwa wananchi zinaendelea kwa ufanisi.

 


Mkutano huo ulilenga kujadili utekelezaji wa shughuli za mashirika yasiyo ya kiserikali, ufuatiliaji wa miradi inayotekelezwa pamoja na kuweka mikakati ya kuimarisha uendelevu wa huduma zinazotolewa kwa jamii.

Comments

Post a Comment

Popular Posts

Vijana watakiwa kujiendeleza nje ya mfumo rasmi

By Halmashauri ya Jiji la Dodoma
Image
Na. Lulu Luvanda, DODOMA Jamii imetakuwa kuwahamasisha vijana waliokosa elimu katika mfumo rasmi kujiunga na Mpango wa Elimu Changamani kwa Vijana walio nje ya shule nchini Tanzania (IPOSA) ili kupata fursa ya kujiendeleza kielimu nje ya mfumo rasmi. Akizungumza katika maadhimisho ya Juma la Elimu ya Watu wazima na nje ya mfumo rasmi yanayofanyika katika viwanja vya Nyerere square, Afisa Elimu ya Watu Wazima na Elimu Nje ya Mfumo Rasmi wa Elimu kutoka Halmashauri ya Wilaya ya Chamwino, Annamaria Kidunda, alisema kuwa IPOSA inalenga kuwapa fursa vijana na wanafunzi ambao walishindwa kuendelea na mfumo rasmi wa elimu kupata nafasi nyingine ya kupata elimu nje ya mfumo rasmi. Kwa mujibu wa Kidunda, IPOSA ni darasa linalowahusisha wanafunzi waliokatisha masomo au kushindwa kuendelea na mfumo rasmi wa elimu, kwa kuwawezesha kupata elimu na mafunzo yatakayowasaidia kukabiliana na mahitaji ya maisha ya sasa. Alisema kuwa programu hiyo inalenga kuondoa pengo katika elimu kwa kuwapatia wa...
Read more

NGOs zatakiwa kuzingatia uwazi na uwajibikaji Dodoma

By Halmashauri ya Jiji la Dodoma
Image
Na. Manase Malima, DODOMA Mashirika yasiyo ya kiserikali wilayani Dodoma yamehimizwa kuzingatia uwazi na uwajibikaji katika utekelezaji wa shughuli na miradi yao ili kuongeza uaminifu na kuhakikisha rasilimali zinatumika kwa manufaa ya jamii. Akizungumza katika mkutano wa Jukwaa la Mashirika Yasiyo ya Kiserikali uliofanyika katika ukumbi wa Halmashauri ya Jiji la Dodoma, Mratibu na Msajili Msaidizi wa Mashirika yasiyo ya kiserikali wa Halmashauri ya Jiji la Dodoma, Peter Mallya alisema kuwa, mashirika yanapaswa kuwa wazi katika utekelezaji wa shughuli zao na kuwajibika kwa wadau pamoja na jamii wanazozihudumia. Aliongeza kuwa uwazi katika utoaji wa taarifa, utekelezaji wa miradi na matumizi ya rasilimali ni muhimu katika kuimarisha uaminifu na ufanisi wa mashirika hayo. Kwa upande wake, Mtendaji Mkuu wa Shirika la SAIKO SENTA (Psychology Sensitization Networking of Tanzania), Sylvia Siriwa alisema kuwa uwazi na uwajibikaji vinasaidia kujenga imani kati ya mashirika, wadau na jamii,...
Read more