Wananchi washauriwa kushirikiana na wataalam wa Afya kufanikisha Kampeni ya Chanjo ya Polio

By Halmashauri ya Jiji la Dodoma

Na. Mwandishi wetu, DODOMA

Wananchi wametakiwa kushirikiana na wataalamu wa afya katika utekelezaji wa kampeni ya chanjo ya Polio itakayoanza tarehe 27-30 Agosti, 2026, zoezi hilo litafanyika nyumba kwa nyumba pamoja na katika maeneo yenye mikusanyiko ya watoto na katika vituo vya kutolea huduma za afya.



Akizungumza katika kipindi cha Password ya leo kupitia Manyunyu TV, Mganga Mkuu wa Jiji la Dodoma, Dkt. Pima Sebastian alisema kuwa kampeni hiyo inalenga kuhakikisha hakuna mtoto anayekosa fursa ya kupata chanjo ya Polio. Aliongeza kuwa timu za afya zitawafikia watoto nyumbani. Maeneo mengine aliyoyataja kuwa yatafikiwa ni katika masoko, shule za msingi, vituo vya kulelea watoto na maeneo mengine yenye mikusanyiko ya watoto.

“Kampeni yetu tutakwenda nyumba kwa nyumba. Yaani mtoto alipo na sisi tutakwenda, tunakwenda na ile ile dhana ya kuhakikisha hakuna mtoto tunamwacha, wananchi hawapaswi kusubiri timu za chanjo ziwafikie majumbani pekee, bali wanapaswa kujitokeza katika vituo vya kutolea huduma za afya watakaposikia zoezi hilo linafanyika katika maeneo yao,” alisema Dkt. Sebastian.

Aidha, alisema kuwa mwitikio wa wananchi katika maandalizi ya kampeni hiyo umekuwa mzuri, akiwashukuru wananchi kwa ushirikiano wao.

Akiongelea maandalizi, aliyataja kuwa yamehusisha viongozi katika ngazi mbalimbali, kuanzia wilaya, tarafa, kata hadi mitaa, ili kuhakikisha taarifa kuhusu kampeni hiyo inawafikia wananchi wote.

Akiongelea usalama wa chanjo hiyo, aliwahakikishia kuwa chanjo inayotolewa ni salama na kuwataka kuwa na amani na kuendelea kupata ufafanuzi kutoka kwa wataalamu wa afya pale wanapokuwa na maswali.

Kampeni ya chanjo ya Polio inatarajiwa kufanyika tarehe 27-30 Agosti, 2026, huku wataalamu wa afya wakisisitizwa umuhimu wa wazazi na walezi kuhakikisha watoto wanapata chanjo hiyo kwa ajili ya kuwalinda dhidi ya ugonjwa wa Polio.

 

Comments

Post a Comment

Popular Posts

Vijana watakiwa kujiendeleza nje ya mfumo rasmi

By Halmashauri ya Jiji la Dodoma
Image
Na. Lulu Luvanda, DODOMA Jamii imetakuwa kuwahamasisha vijana waliokosa elimu katika mfumo rasmi kujiunga na Mpango wa Elimu Changamani kwa Vijana walio nje ya shule nchini Tanzania (IPOSA) ili kupata fursa ya kujiendeleza kielimu nje ya mfumo rasmi. Akizungumza katika maadhimisho ya Juma la Elimu ya Watu wazima na nje ya mfumo rasmi yanayofanyika katika viwanja vya Nyerere square, Afisa Elimu ya Watu Wazima na Elimu Nje ya Mfumo Rasmi wa Elimu kutoka Halmashauri ya Wilaya ya Chamwino, Annamaria Kidunda, alisema kuwa IPOSA inalenga kuwapa fursa vijana na wanafunzi ambao walishindwa kuendelea na mfumo rasmi wa elimu kupata nafasi nyingine ya kupata elimu nje ya mfumo rasmi. Kwa mujibu wa Kidunda, IPOSA ni darasa linalowahusisha wanafunzi waliokatisha masomo au kushindwa kuendelea na mfumo rasmi wa elimu, kwa kuwawezesha kupata elimu na mafunzo yatakayowasaidia kukabiliana na mahitaji ya maisha ya sasa. Alisema kuwa programu hiyo inalenga kuondoa pengo katika elimu kwa kuwapatia wa...
Read more

NGOs zatakiwa kuzingatia uwazi na uwajibikaji Dodoma

By Halmashauri ya Jiji la Dodoma
Image
Na. Manase Malima, DODOMA Mashirika yasiyo ya kiserikali wilayani Dodoma yamehimizwa kuzingatia uwazi na uwajibikaji katika utekelezaji wa shughuli na miradi yao ili kuongeza uaminifu na kuhakikisha rasilimali zinatumika kwa manufaa ya jamii. Akizungumza katika mkutano wa Jukwaa la Mashirika Yasiyo ya Kiserikali uliofanyika katika ukumbi wa Halmashauri ya Jiji la Dodoma, Mratibu na Msajili Msaidizi wa Mashirika yasiyo ya kiserikali wa Halmashauri ya Jiji la Dodoma, Peter Mallya alisema kuwa, mashirika yanapaswa kuwa wazi katika utekelezaji wa shughuli zao na kuwajibika kwa wadau pamoja na jamii wanazozihudumia. Aliongeza kuwa uwazi katika utoaji wa taarifa, utekelezaji wa miradi na matumizi ya rasilimali ni muhimu katika kuimarisha uaminifu na ufanisi wa mashirika hayo. Kwa upande wake, Mtendaji Mkuu wa Shirika la SAIKO SENTA (Psychology Sensitization Networking of Tanzania), Sylvia Siriwa alisema kuwa uwazi na uwajibikaji vinasaidia kujenga imani kati ya mashirika, wadau na jamii,...
Read more