Hakuna Mamluki yeyote atakayeandikishwa kwenye orodha ya wapiga kura Jiji la Dodoma

By Halmashauri ya Jiji la Dodoma

Na. Faraja Mbise, DODOMA

Msimamizi wa Uchaguzi Halmashauri ya Jiji la Dodoma, Dkt. Frederick Sagamiko amekanusha taarifa zinazosambaa katika mitandao ya kijamii kuhusu mwenendo wa uandikishaji kuwa wanaandikishwa mamluki kwenye orodha ya wapiga kura.

Msimamizi wa Uchaguzi Halmashauri ya Jiji la Dodoma, Dkt. Frederick Sagamiko akifafanua mwenendo wa zoezi la uandikishaji orodha ya wapiga kura Jiji la Dodoma



Kanusho hilo alilitoa ofisini kwake alipokuwa akiongea na waandishi wa habari kufuatia tuhuma zilizotolewa na Chama cha Demokrasia na Maendeleo Chadema kuhusu mwenendo wa uandikishaji orodha ya wapiga kura unaoendelea wakidai kuwa kituo kimoja kiliandikisha watu kinyume na utaratibu.

Dkt. Sagamiko alisema “kutokana na taarifa zilizosambaa katika mitandao ya kijamii, zinazoelezea kuhusu muenendo wa uandikishaji katika Halmashauri ya Jiji la Dodoma kwa bahati mbaya sana taarifa ile inaelezea kuhusu mwenendo mbaya wa uandikishaji. Baada ya kupitia na kusikiliza kwa makini video ile, nikabaini kwamba tatizo sio mwenendo wa uandikishaji, bali tatizo ni uelewa mdogo juu ya kanuni na miongozo inayotumika katika uendeshaji wa Uchaguzi wa Serikali za Mitaa mwaka huu 2024”.

Msimamizi huyo alifafanua kuwa wanaoruhusiwa kuandikisha katika orodha ya wapiga kura ni maafisa waandikishaji waliochaguliwa na Msimamizi wa Uchaguzi, kushiriki katika kuandika taarifa za mpiga kura. “Kwenye kituo, nje ya mwandikishaji na wakala wa chama, wapo baadhi ya watu walioruhusiwa kikanuni kama Msimamizi wa Uchaguzi, kuhakikisha anatimiza wajibu wake na kwenda kufanya ukaguzi mwingine. Lakini hakuna mtu mwingine anaeruhusiwa kuwa kwenye kituo cha kujiandikishia” alisisitiza Dkt. Sagamiko.

Msimamizi huyo alisema kuwa Halmashauri ya Jiji la Dodoma ina jumla ya vituo 666 vya kujiandikishia wapiga kura na vyama vya siasa vimeruhusiwa kuweka mawakala wao katika kila kituo. “Kwa sisi Halmashauri ya Jiji la Dodoma tuna jumla ya vituo 666, na nchi yetu tuna vyama vya siasa takribani 19 vyenye usajili wa kudumu na sisi tunaamini vyote hivyo vinashiriki katika uchaguzi huu. Halmashauri tulifuata taratibu zote kuwaarifu vyama kuweza kuweka mawakala wakati huu wa kujiandikisha. Naomba nichukue nafasi hii kuwataarifu kwamba ni vyama viwili tu vilivyofanikiwa kuweka mawakala, Chama Cha Mapinduzi (CCM) kimefanikiwa kuweka mawakala 666 katika kila kituo na Chama cha Demokrasia na Maendeleo (CHADEMA) wamefanikiwa kuweka mawakala 55. Kwa kuwa malalamiko yale yametolewa na viongozi CHADEMA, naomba kutoa taarifa kuwa CHADEMA wamefanikiwa kuweka mawakala katika kata sita, kati ya kata 41 zilizopo Halmashauri ya Jiji la Dodoma. Kata hizo ni Kikombo (9), Kikuyu Kaskazini (12), Chamwino (7), Chihanga (4), Ng’hong’onha (19) na Mbabala (4). Lakini kwa bahati mbaya eneo ambalo limeripotiwa matukio kutokea hakuna mawakala wa CHADEMA waliowekwa” alisema Dkt. Sagamiko kwa mshangao.


Kamati ya Usimamizi wa Uchaguzi wa Serikali za Mitaa Halmashauri ya Jiji la Dodoma


Msimamizi huyo alivitaka vyama vya siasa kufuata kanuni na miongozo ya Uchaguzi wa Serikali za Mitaa ili uchaguzi uwe wa huru na wa demokrasia. “Nitoe rai kwa viongozi wa vyama vya siasa kutokushiriki katika uvunjifu wa amani katika maeneo yetu ya vituo na wazingatie kanuni na kwa bahati nzuri walishagawiwa kanuni” aliongea kwa msisitizo Dkt. Sagamiko.

Wakati huohuo, aliwataka wananchi wa Halmashauri ya Jiji la Dodoma wenye sifa za kujiandikisha kujitokeza na kujiandikisha kwenye orodha ya wapiga kura ili waweze kuchagua viongozi wa Serikali za Mitaa. Aliwahakikishia kuwa hakuna mtu wa kuwapora haki hiyo. Aliwakumbusha sifa za kujiandikisha katika orodha ya wapiga kura ni kuwa mtanzania, mwenye umri wa miaka 18 na kuendelea, mkazi wa kijiji, kitongoji au mtaa ambao uchaguzi unafanyika na uwe na akili timamu.

Akiongelea umuhimu wa waandishi wa habari na vyombo vya habari, alisema kuwa ni wadau muhimu katika kutoa elimu na hamasa kwa wananchi. “Kwakuwa ninyi ni wadau muhimu, mnapaswa kuzielewa kanuni hizi. Naomba niwakabidhi kanuni hizi na ninawaomba mzisome na pale mtu yeyote atakapoitwa kwenye ‘press’, mpitie muongozo wa uchaguzi kabla hamjaenda kutoa taarifa ili muweze kujiridhisha kama huyo mtu ameongea kwa mujibu wa kanuni au la” alisema Dkt. Sagamiko.



Ratiba ya shughuli za uchaguzi wa serikali za mitaa inaonesha kuwa zoezi la uandikishaji katika orodha ya wapiga kura lilianza tarehe 11 Oktoba, 2024 litamalizika tarehe 20 Oktoba, 2024.

MWISHO

Comments

Post a Comment

Popular Posts

Wananchi Makutupora wafunguka changamoto ya Maji, Umeme na Shule kwa Mkuu wa Mkoa

By Halmashauri ya Jiji la Dodoma
Na. Halima Majidi, DODOMA Wananchi wa Kata ya Makutupora, jijini Dodoma, wameeleza kilio chao juu ya changamoto kubwa zinazowakabili, zikiwemo ukosefu wa maji safi, matatizo ya umeme, pamoja na shule kuwa mbali, hali inayowakwamisha katika shughuli za kila siku. Wakizungumza katika mkutano wa mkuu wa mkoa uliofanyika katika Kata ya Makutupora, baadhi ya wakazi wa eneo hilo wamesema wamekuwa wakikumbana na shida ya maji kwa muda mrefu, huku wakilazimika kutembea umbali mrefu kutafuta huduma hiyo muhimu. Akitoa kero hiyo, mkazi wa Mtaa wa Sekondari, Pasisi James, alisema kuwa, tangu kuhamia katika mtaa huo ni miaka mingi hivyo ameiomba serikali kuwasogezea huduma ya maji kwa sababu imekuwa ni changamoto kubwa na hivyo kushindwa kuendelea na kazi zao za kila siku. “Maji ni tatizo hapa kwetu, tunamiaka mingi tangu kuhamia hapa, nimekuja hata kusoma sijui mpaka leo bado tunahangaikia maji, tunachukua maji kwa wachina dumu moja hilo hilo ufulie pamoja na kunywa, hapo naomba mtusaidie” ...
Read more

Waziri Mchengerwa apongeza usimamizi wa miradi jijini Dodoma

By Halmashauri ya Jiji la Dodoma
Image
Na. Aisha Ibrahim, DODOMA Waziri wa Nchi, Ofisi ya Rais Tawala za Mikoa na Serikali za Mitaa (TAMISEMI), Mohamed Mchengerwa (Mb), aliwapongeza watumishi wa umma kwa kusimamia miradi mbalimbali jijini Dodoma ikiwa ni kuunga mkono juhudi za Rais wa Jamhuri ya Muungano wa Tanzania, Dkt. Samia Suluhu Hassan. Aliyasema hayo katika Hafla ya utiaji saini mkataba wa ujenzi wa Soko Kuu la Majengo pamoja ujenzi wa kituo cha daladala eneo la Mshikamano, Kizota na Nzuguni, iliyofanyika kiwanja cha Chinangali Park, Jijini Dodoma. Akizungumzia kuhusu utekelezaji wa miradi mbalimbali Mohamed Mchengerwa, alitaka wakandarasi wote ambao hawajatekeleza majukumu yao katika miradi mbalimbali ikiwemo mradi wa ujenzi wa barabara, kutopewa   fursa ya kufanya kazi yoyote   ikiwa ni onyo kwa wale wote wanaofanya kazi kwa uzembe na kushindwa kutekeleza majukumu yao kwa wakati. "Maelekezo yangu kwa mtendaji mkuu na katibu mkuu wa TARURA, Mkandarasi huyu asiruhusiwe kufanya kazi yoyote chini ya TA...
Read more

Mkataba ujenzi Uwanja wa Mpira wa Miguu wasainiwa Dodoma

By Halmashauri ya Jiji la Dodoma
Na. Aisha Ibrahim, DODOMA Katibu Mkuu wa Wizara ya Habari, Utamaduni, Sanaa na Michezo, Greyson Msigwa, amesema mradi wa ujenzi wa uwanja wa mpira wa miguu Dodoma, utakaoweza kubeba watu 32,000 ambao utagharimu kiasi cha shilingi bilioni 352 fedha za kitanzania, unatarajiwa kukamilika ndani ya miezi 24, chini ya serikali ya Jamhuri ya Muungano wa Tanzania. Aliyasema hayo katika hafla ya utiaji saini mkataba wa ujenzi wa uwanja wa mpira wa miguu Dodoma, uliohusisha wizara hiyo na Kampuni ya Lemonta SPA, iliofanyika kiwanja cha Changamani, Kata ya Nzuguni, jijini Dodoma. Akizungumza kuhusu lengo la ujenzi wa uwanja huo, Msigwa alisema, mradi huo ni fursa kwa maendeleo ya michezo kwa wakazi wa Jiji la Dodoma kwasababu uwanja huo utatumika katika mashindano mbalimbali kitaifa na kimataifa ili kuhakikisha sekta ya michezo inazidi kukua. “Mradi huu ni fursa kwa maendeleo ya wakazi wa Dodoma lakini ni fursa kubwa kwa wanamichezo katika kukuza vipaji vyao, na sisi kama wizara tumejip...
Read more