Waziri Mkenda: Michezo na Sanaa shuleni haitaondolewa tena

By Halmashauri ya Jiji la Dodoma

Na. Denis Mlowe, IRINGA

WAZIRI wa Elimu, Sayansi na Teknolojia, Prof. Adolf Mkenda, amesema serikali imejipanga kuhakikisha michezo na sanaa zinaendelea kupewa nafasi kubwa katika mfumo wa elimu nchini, akisisitiza kuwa shughuli hizo hazitaondolewa tena shuleni kwa kuwa ni sehemu muhimu ya kukuza vipaji, afya, ajira na ushindani wa kimataifa.



Waziri Mkenda alitoa kauli hiyo wakati akifungua rasmi Mashindano ya Umoja wa Michezo na Taaluma kwa Shule za Sekondari Tanzania (UMISSETA) 2026 yaliyofanyika katika viwanja vya Shule ya Sekondari Lugalo mkoani Iringa.

Katika hotuba yake, Waziri Mkenda aliushukuru Mkoa wa Iringa kwa kuwa mwenyeji wa mashindano hayo, akisema mkoa huo umeendelea kuwa kivutio kutokana na mazingira yake mazuri na ukarimu wa wananchi wake.

“Tunafurahi sana kuja Iringa tunawashukuru viongozi na wananchi wote wa Iringa kwa kutupokea na kuwa wenyeji wa mashindano haya muhimu kwa maendeleo ya michezo nchini,” alisema.

Aidha, aliwapongeza wanafunzi, walimu na viongozi wa michezo waliofanikiwa kufika katika hatua ya taifa baada ya kushinda katika ngazi mbalimbali kuanzia shule, kata, wilaya na mikoa.

Waziri Mkenda alitoa pongezi kwa sekretarieti ya mashindano pamoja na wizara na taasisi zilizoshiriki katika maandalizi ya UMISSETA, akitaja Ofisi ya Waziri Mkuu-TAMISEMI, Wizara ya Habari, Utamaduni, Sanaa na Michezo, Wizara ya Elimu na Mafunzo ya Amali Zanzibar pamoja na Wizara ya Elimu, Sayansi na Teknolojia.

Akizungumzia nafasi ya michezo katika maendeleo ya taifa, Mkenda alisema michezo ni zaidi ya burudani kwani ni chanzo cha afya bora, mshikamano wa jamii, ajira na fursa za biashara.



Alisema shule zinapaswa kuendelea kuwa viwanda vya kuzalisha na kukuza vipaji vya wanafunzi katika michezo na sanaa, huku akisisitiza kuwa sera ya elimu inatambua rasmi umuhimu wa kubaini na kuendeleza vipaji mbalimbali mapema.

“Kupitia sera ya elimu, serikali imeweka wazi kuwa itaendelea kubaini na kuendeleza wanafunzi wenye vipaji katika maeneo mbalimbali ikiwemo michezo, sanaa, sayansi na teknolojia,” alisema.

Mkenda alieleza kuwa michezo na sanaa za maonyesho zimeingizwa rasmi katika mafunzo ya amali, sambamba na sekta nyingine kama kilimo, uvuvi na ufundi, hatua inayolenga kuwajengea wanafunzi ujuzi na uwezo wa kujitegemea.

Akihamasisha wanafunzi kushiriki kwa bidii katika mashindano hayo, Waziri Mkenda alisema kaulimbiu ya UMISSETA 2026 inayosema “Michezo na Sanaa, Shule ni Daraja la Ajira, Afya na Ushindani wa Kimataifa” inapaswa kuwapa hamasa ya kuangalia mbali zaidi ya mashindano ya ndani.

 

Alisema Tanzania ina kila sababu ya kuamini kuwa siku zijazo inaweza kufuzu na kushiriki Kombe la Dunia kupitia uwekezaji unaoendelea kufanyika katika michezo ya shule na maendeleo ya vipaji vya vijana.

“Ninaamini baadhi ya watakaocheza Kombe la Dunia katika miaka ijayo wanaweza kuwa miongoni mwa wanafunzi waliopo hapa leo. Hivyo mshiriki mashindano haya kwa bidii, nidhamu na kujituma,” alisema.

Aliwataka washiriki wote kuzingatia usalama, maadili na uadilifu wakati wote wa mashindano, akisisitiza kuwa mafanikio ya michezo yanategemea nidhamu na kuheshimu sheria na taratibu.

Kwa upande mwingine, aliipongeza hatua ya kuwapa wanafunzi nafasi ya kusimamia michezo kama waamuzi, akisema jambo hilo linasaidia kujenga kizazi cha wataalamu wa michezo wenye weledi na uwezo wa kusimamia mashindano kwa haki.

Mashindano ya UMISSETA 2026 yamewakutanisha wanafunzi kutoka mikoa mbalimbali nchini kwa lengo la kuibua na kuendeleza vipaji vya michezo na sanaa vinavyoweza kuiwakilisha Tanzania katika mashindano ya kikanda na kimataifa.

 

Comments

Post a Comment

Popular Posts

Ujenzi wa madarasa 3 S/M Mazengo kukamilika Julai, 2026

By Halmashauri ya Jiji la Dodoma
Image
Na. Mwandishi wetu, KIKUYU KASKAZINI   Uongozi wa Mtaa wa Kigamboni, Kata ya Kikuyu Kaskazini umepongeza kasi ya ujenzi madarasa matatu katika Shule ya Msingi Mazengo kwa gharama ya shilingi 71,373,640 kwa lengo la kuboresha mazingira ya wanafunzi kujifunzia na kuelekeza mradi huo kukamilika kwa wakati.   Pongezi hizo zilitolewa na Afisa Mtendaji Kata ya Kigamboni, Farijala Kunga alipoongoza wajumbe wa Serikali ya Mtaa wa Kigamboni na maafisa ugani wa Kata ya Kikuyu Kaskazini kutembelea na kukagua maendeleo ya ujenzi wa madarasa matatu katika Shule ya Msingi Mazengo. Alisema kuwa wameridhika na kasi ya ujenzi wa madarasa hayo ambayo yanatarajiwa kukamilika Mwezi Julai, 2026 kabla ya shule kufunguliwa. “Ni matumaini yangu kuwa ujenzi huu utakamilika kwa muda ulipangwa ili wanafunzi watakapofungua shule waweze kuyatumia. Madarasa haya ni utekelezaji wa ahadi ya Rais, kuleta tabasamu kwa wananchi, hapa ni wanafunzi na walimu watakaotabasamu” alisema Kunga. ...
Read more

Bodaboda Mtaa wa Kigamboni wanufaika na Kliniki ya kutatua kero

By Halmashauri ya Jiji la Dodoma
Image
Na. Mwandishi wetu, KIKUYU KASKAZINI MTAA wa Kigamboni umewatembelea maafisa usafirishaji kusikiliza changamoto zao na kuwaelezea fursa ya mikopo isiyo na riba ya asilimia 10 inayotolewa na Halmashauri ya Jiji la Dodoma kwa makundi ya vijana, wanawake na watu wenye ulemavu ili waweze kunufaika nayo. Akizungumza na maafisa usafirishaji wa Mtaa wa Kigamboni Kata ya Kikuyu Kaskazini, Afisa Mtendaji Mtaa wa Kigamboni, Farijala Kunga alisema kuwa serikali ina wajibu wa kuwatembelea na kuwasikiliza wananchi wake. “Leo Serikali ya Mtaa wa Kigamboni imewatembelea maafisa usafirishaji (waendesha bodaboda) katika Mtaa wa Kigamboni kusikiliza kero zao na kuzipatia ufumbuzi. Huu ni utekelezaji wa maelekezo ya serikali wa kuyafikia makundi mbalimbali kuyasikiliza na kutatua kero zao. Aidha, tumewaelezea fursa za mikopo ya asilimia 10 inayotolewa na halmashauri ya jiji la Dodoma kwa makundi ya vijana, wanawake na watu wenye ulemavu. Tumewapa elimu kuhusu manufaa ya kiuchumi ya mikopo hiyo ukiwa ...
Read more