Jiji la Dodoma kinara taaluma

By Halmashauri ya Jiji la Dodoma

Na. Dennis Gondwe, DODOMA

HALMASHAURI ya Jiji la Dodoma imeendelea kufanya vizuri katika taaluma kwa kufaulisha kwa asilimia 93.18 wanafunzi waliohitimu elimu ya msingi mwaka 2023 kutokana na ushirikiano mzuri baina ya halmashauri na wadau wa sekta ya elimu.

Mkuu wa Divisheni ya Elimu ya Awali na Msingi Halmashauri ya Jiji la Dodoma, Mwl. Prisca Myalla alipokuwa akiwasilisha taarifa ya utekelezaji wa shughuli za elimu


Kauli hiyo ilitolewa na Mkuu wa Divisheni ya Elimu ya Awali na Msingi Halmashauri ya Jiji la Dodoma, Mwl. Prisca Myalla alipokuwa akiwasilisha taarifa ya utekelezaji wa shughuli za elimu katika kikao cha wadau wa elimu kilichofanyika katika Shule ya Msingi St. Gasper iliyopo jijini Dodoma.

Mwl. Myalla alisema “Halmashauri ya Jiji la Dodoma kupitia Divisheni ya Elimu Awali na Msingi imeendelea kufanya vizuri katika taaluma kupitia matokeo ya mitihani mbalimbali ya kuhitimu elimu ya msingi na Mtihani wa Upimaji Darasa la Nne. Aidha, shule binafsi zimeendelea kufanya vizuri kwenye mitihani hiyo na kuchangia ongezeko la wastani wa ufaulu kutoka wastani 179 kwa mwaka 2022 na kufikia wastani wa 189 kwa mwaka 2023. Jumla ya watahiniwa 14,907 sawa na asilimia 93.18 waliohitimu elimu ya msingi 2023 walifanikiwa kufaulu na kujiunga na kidato cha kwanza kwa mwaka 2024. Hatua hii ni ya mafanikio makubwa ukilinganisha na hali ya ufaulu wa mwaka 2022 ambapo asilimia ya ufaulu ilikuwa 89.90”

Kuhusu elimu jumuishi, alisema kuwa halmashauri inatekeleza Elimu Maalum na Jumunishi katika shule 61 zinazopokea wanafunzi wenye mahitaji maalum. “Kati ya shule hizo zenye vitengo ni 11 (Hombolo Bwawani, Mpunguzi, Mlezi, Kisasa, Nala, Chinangali, Nzunguni B, Generali Msuguli, Mbwanga, Nkuhungu na Ndachi) shule maalum moja ya Dodoma Viziwi na shule 50 ni Jumuishi” alisema.

Akiongelea utatuzi wa changamoto ya miundombinu ya madawati na maji katika shule za awali na msingi, alisema kuwa halmashauri inaendelea kuzitafutia ufumbuzi. Halmashauri imetenga shilingi 358,890,000 kutoka mapato ya ndani kwa ajili ya kutengeneza madawati 3,418 katika mkakati wake wa kupunguza changamoto ya upungufu wa madawati kwa wanafunzi wa shule za msingi. “Halmashauri imetenga fedha kwa ajili ya gharama za uchimbaji wa visima kwenye maeneo ya shule ili kuweza kupatikana kwa huduma ya maji kwa wanafunzi. Halmashauri inaendelea kulipa madeni ya walimu mbalimbali kama vile likizo, malipo ya wastaafu pamoja na uhamisho kadri fedha zinavyopatikana kutoka serikali kuu au mapato ya ndani” alisema Mwl. Myalla.

Katika kuhakikisha shule zote zinatoa huduma ya chakula shuleni, katika msimu huu wa mvua shule zote zenye maeneo ya kulima zimeagizwa zilime mazao mbalimbali ya chakula kama Mtama. “Halmashauri imetenga bajeti ya shilingi 100,000,000 kwa ajili ya kununua mahindi yatakayoandaliwa na kusagwa ili kugawiwa shuleni kwa ajili ya uji kwa wanafunzi hasa kwa shule zenye matokeo duni ya mitihani mbalimbali” alisema Mwl. Myalla.

Kikao cha wadau wa elimu katika Halmashauri ya Jiji la Dodoma kilifanyika kwa lengo la kuwapa fursa wadau wa elimu kujadili mafanikio na changamoto za sekta ya elimu na kutoa zawadi kwa shule zilizofanya vizuri, walimu na wanafunzi na viongozi walioshiriki katika kuhamasisha elimu katika Mkoa wa Dodoma.

MWISHO

Comments

Post a Comment

Popular Posts

Wananchi Makutupora wafunguka changamoto ya Maji, Umeme na Shule kwa Mkuu wa Mkoa

By Halmashauri ya Jiji la Dodoma
Na. Halima Majidi, DODOMA Wananchi wa Kata ya Makutupora, jijini Dodoma, wameeleza kilio chao juu ya changamoto kubwa zinazowakabili, zikiwemo ukosefu wa maji safi, matatizo ya umeme, pamoja na shule kuwa mbali, hali inayowakwamisha katika shughuli za kila siku. Wakizungumza katika mkutano wa mkuu wa mkoa uliofanyika katika Kata ya Makutupora, baadhi ya wakazi wa eneo hilo wamesema wamekuwa wakikumbana na shida ya maji kwa muda mrefu, huku wakilazimika kutembea umbali mrefu kutafuta huduma hiyo muhimu. Akitoa kero hiyo, mkazi wa Mtaa wa Sekondari, Pasisi James, alisema kuwa, tangu kuhamia katika mtaa huo ni miaka mingi hivyo ameiomba serikali kuwasogezea huduma ya maji kwa sababu imekuwa ni changamoto kubwa na hivyo kushindwa kuendelea na kazi zao za kila siku. “Maji ni tatizo hapa kwetu, tunamiaka mingi tangu kuhamia hapa, nimekuja hata kusoma sijui mpaka leo bado tunahangaikia maji, tunachukua maji kwa wachina dumu moja hilo hilo ufulie pamoja na kunywa, hapo naomba mtusaidie” ...
Read more

Waziri Mchengerwa apongeza usimamizi wa miradi jijini Dodoma

By Halmashauri ya Jiji la Dodoma
Image
Na. Aisha Ibrahim, DODOMA Waziri wa Nchi, Ofisi ya Rais Tawala za Mikoa na Serikali za Mitaa (TAMISEMI), Mohamed Mchengerwa (Mb), aliwapongeza watumishi wa umma kwa kusimamia miradi mbalimbali jijini Dodoma ikiwa ni kuunga mkono juhudi za Rais wa Jamhuri ya Muungano wa Tanzania, Dkt. Samia Suluhu Hassan. Aliyasema hayo katika Hafla ya utiaji saini mkataba wa ujenzi wa Soko Kuu la Majengo pamoja ujenzi wa kituo cha daladala eneo la Mshikamano, Kizota na Nzuguni, iliyofanyika kiwanja cha Chinangali Park, Jijini Dodoma. Akizungumzia kuhusu utekelezaji wa miradi mbalimbali Mohamed Mchengerwa, alitaka wakandarasi wote ambao hawajatekeleza majukumu yao katika miradi mbalimbali ikiwemo mradi wa ujenzi wa barabara, kutopewa   fursa ya kufanya kazi yoyote   ikiwa ni onyo kwa wale wote wanaofanya kazi kwa uzembe na kushindwa kutekeleza majukumu yao kwa wakati. "Maelekezo yangu kwa mtendaji mkuu na katibu mkuu wa TARURA, Mkandarasi huyu asiruhusiwe kufanya kazi yoyote chini ya TA...
Read more

Mkataba ujenzi Uwanja wa Mpira wa Miguu wasainiwa Dodoma

By Halmashauri ya Jiji la Dodoma
Na. Aisha Ibrahim, DODOMA Katibu Mkuu wa Wizara ya Habari, Utamaduni, Sanaa na Michezo, Greyson Msigwa, amesema mradi wa ujenzi wa uwanja wa mpira wa miguu Dodoma, utakaoweza kubeba watu 32,000 ambao utagharimu kiasi cha shilingi bilioni 352 fedha za kitanzania, unatarajiwa kukamilika ndani ya miezi 24, chini ya serikali ya Jamhuri ya Muungano wa Tanzania. Aliyasema hayo katika hafla ya utiaji saini mkataba wa ujenzi wa uwanja wa mpira wa miguu Dodoma, uliohusisha wizara hiyo na Kampuni ya Lemonta SPA, iliofanyika kiwanja cha Changamani, Kata ya Nzuguni, jijini Dodoma. Akizungumza kuhusu lengo la ujenzi wa uwanja huo, Msigwa alisema, mradi huo ni fursa kwa maendeleo ya michezo kwa wakazi wa Jiji la Dodoma kwasababu uwanja huo utatumika katika mashindano mbalimbali kitaifa na kimataifa ili kuhakikisha sekta ya michezo inazidi kukua. “Mradi huu ni fursa kwa maendeleo ya wakazi wa Dodoma lakini ni fursa kubwa kwa wanamichezo katika kukuza vipaji vyao, na sisi kama wizara tumejip...
Read more