Bodaboda ni kazi, epukeni uhalifu

By Halmashauri ya Jiji la Dodoma

Na. Dennis Gondwe, MNADANI

VIJANA waendesha Pikipiki (bodaboda) katika Kata ya Mnadani wametakiwa kuichukulia kazi ya kuendesha pikipiki kama kazi nyingine na kujiepusha na kujiunga kwenye makundi ya uhalifu.

Picha kutoka mtandaoni


Kauli hiyo ilitolewa na Mkaguzi Msaidizi wa Polisi, Focus Ishika alipokuwa akiongea na wananchi wa Mtaa wa Mnadani katika mkutano wa hadhara uliofanyika katika mtaa huo.

Mkaguzi Msaidizi Ishika ambae pia ni Polisi Kata ya Mnadani alisema kuwa vijana waendesha bodaboda wanakosa elimu ya umuhimu wa kazi wanayofanya. “Vijana wetu wa bodaboda wanakosa elimu juu ya umuhimu wa kuichukulia kazi ya bodaboda kama kazi nyingine. Wazazi wenye watoto wanaoendesha pikipiki toeni elimu kwa vijana wenu ajira ya udereva pikipiki waichukulie kama yule anayeamka asubuhi na kwenda benki au kwenda kufundisha (mwalimu) wanatakiwa kuifanya kazi hiyo kwa moyo na bidii. Kwa hiyo makosa tunayo sisi. Mwanao anatoka asubuhi na pikipiki hujui anapaki kituo gani, hujui rafiki zake nani, hujui mishemishe zake ni zipi, unakuja kupewa taarifa kuwa mwanao yupo Polisi amekamatwa unakuja juu, mwanangu siyo mwizi unamjua mwanao vizuri kweli??” alihoji Mkaguzi Msaidizi Ishika.

Aidha, aliwashauri wananchi kuwa wanapopewa taarifa za uhalifu dhidi ya watoto wao kuzifanyia kazi. “Mimi niwaombe, tujaribu kupendana unapopewa taarifa juu ya mwanao ifanyie kazi kuliko kukurupuka kukasirika. Hakuna anayemjua mwanao kama walimwengu, na walimwengu ndiyo sisi” aliongeza.

Alishauri mabalozi kuwa na taarifa sahihi za vijiwe vya bodaboda na usajili wake. “Tusaidiane kuvuka huu mwaka salama sisi pamoja na watoto wetu, usimuonee muhari. Kila balozi anawajibu kupita kwenye kila kituo cha bodaboda kuhakikisha anakikagua, anawajua vizuri waendesha bodaboda na vituo vimesajiliwa. Utaratibu sio mgumu wa kusajili kituo cha bodaboda, unachukua barua kwa Afisa Mtendaji unaenda Latra kituo kinapewa jina na kusajiliwa na idadi inajulikana ni watu 15” alisisitiza.

Vilevile, alishauri kaya kuwa na filimbi kwa ajili ya usalama wao. “Mzee mwenzangu huna filimbi? kuwa na filimbi ili linapotokea piga filimbi watu watoke watoe msaada. Nikisema wangapi wanafilimbi nyumbani kwao hapa nitapata wachache. Kuwa na filimbi na tochi nyumbani kwako kwa ajili ya ulinzi wako binafsi. Mfano, ukiwa na tochi, umesikia kishindo nje, mulika atakimbia tu hakuna mwizi anaependa mwanga, lazima atakimbia tu” alishauri.

MWISHO 

Comments

Post a Comment

Popular Posts

Wananchi Makutupora wafunguka changamoto ya Maji, Umeme na Shule kwa Mkuu wa Mkoa

By Halmashauri ya Jiji la Dodoma
Na. Halima Majidi, DODOMA Wananchi wa Kata ya Makutupora, jijini Dodoma, wameeleza kilio chao juu ya changamoto kubwa zinazowakabili, zikiwemo ukosefu wa maji safi, matatizo ya umeme, pamoja na shule kuwa mbali, hali inayowakwamisha katika shughuli za kila siku. Wakizungumza katika mkutano wa mkuu wa mkoa uliofanyika katika Kata ya Makutupora, baadhi ya wakazi wa eneo hilo wamesema wamekuwa wakikumbana na shida ya maji kwa muda mrefu, huku wakilazimika kutembea umbali mrefu kutafuta huduma hiyo muhimu. Akitoa kero hiyo, mkazi wa Mtaa wa Sekondari, Pasisi James, alisema kuwa, tangu kuhamia katika mtaa huo ni miaka mingi hivyo ameiomba serikali kuwasogezea huduma ya maji kwa sababu imekuwa ni changamoto kubwa na hivyo kushindwa kuendelea na kazi zao za kila siku. “Maji ni tatizo hapa kwetu, tunamiaka mingi tangu kuhamia hapa, nimekuja hata kusoma sijui mpaka leo bado tunahangaikia maji, tunachukua maji kwa wachina dumu moja hilo hilo ufulie pamoja na kunywa, hapo naomba mtusaidie” ...
Read more

Waziri Mchengerwa apongeza usimamizi wa miradi jijini Dodoma

By Halmashauri ya Jiji la Dodoma
Image
Na. Aisha Ibrahim, DODOMA Waziri wa Nchi, Ofisi ya Rais Tawala za Mikoa na Serikali za Mitaa (TAMISEMI), Mohamed Mchengerwa (Mb), aliwapongeza watumishi wa umma kwa kusimamia miradi mbalimbali jijini Dodoma ikiwa ni kuunga mkono juhudi za Rais wa Jamhuri ya Muungano wa Tanzania, Dkt. Samia Suluhu Hassan. Aliyasema hayo katika Hafla ya utiaji saini mkataba wa ujenzi wa Soko Kuu la Majengo pamoja ujenzi wa kituo cha daladala eneo la Mshikamano, Kizota na Nzuguni, iliyofanyika kiwanja cha Chinangali Park, Jijini Dodoma. Akizungumzia kuhusu utekelezaji wa miradi mbalimbali Mohamed Mchengerwa, alitaka wakandarasi wote ambao hawajatekeleza majukumu yao katika miradi mbalimbali ikiwemo mradi wa ujenzi wa barabara, kutopewa   fursa ya kufanya kazi yoyote   ikiwa ni onyo kwa wale wote wanaofanya kazi kwa uzembe na kushindwa kutekeleza majukumu yao kwa wakati. "Maelekezo yangu kwa mtendaji mkuu na katibu mkuu wa TARURA, Mkandarasi huyu asiruhusiwe kufanya kazi yoyote chini ya TA...
Read more

Mkataba ujenzi Uwanja wa Mpira wa Miguu wasainiwa Dodoma

By Halmashauri ya Jiji la Dodoma
Na. Aisha Ibrahim, DODOMA Katibu Mkuu wa Wizara ya Habari, Utamaduni, Sanaa na Michezo, Greyson Msigwa, amesema mradi wa ujenzi wa uwanja wa mpira wa miguu Dodoma, utakaoweza kubeba watu 32,000 ambao utagharimu kiasi cha shilingi bilioni 352 fedha za kitanzania, unatarajiwa kukamilika ndani ya miezi 24, chini ya serikali ya Jamhuri ya Muungano wa Tanzania. Aliyasema hayo katika hafla ya utiaji saini mkataba wa ujenzi wa uwanja wa mpira wa miguu Dodoma, uliohusisha wizara hiyo na Kampuni ya Lemonta SPA, iliofanyika kiwanja cha Changamani, Kata ya Nzuguni, jijini Dodoma. Akizungumza kuhusu lengo la ujenzi wa uwanja huo, Msigwa alisema, mradi huo ni fursa kwa maendeleo ya michezo kwa wakazi wa Jiji la Dodoma kwasababu uwanja huo utatumika katika mashindano mbalimbali kitaifa na kimataifa ili kuhakikisha sekta ya michezo inazidi kukua. “Mradi huu ni fursa kwa maendeleo ya wakazi wa Dodoma lakini ni fursa kubwa kwa wanamichezo katika kukuza vipaji vyao, na sisi kama wizara tumejip...
Read more